Лоли цоха
Дэ мангэ чён харкуно, Сыр бубно - башатуно, Мири цоха лоли мэ лав Тэ прэ площадь уджяв тэ кхэлав.
Дэ баваля хачькирдэ Сыр фэлды южна лондэ, Дро чюрья лэн мэ вкхував Тэ прэ площадь уджяв тэ кхэлав.
Дэ и вэшытко паны, Кало сыр э ромны, Сыр ченя лэс ублавав Тэ прэ площадь уджяв тэ кхэлав.
Ту гаравэс о паны, О чён, баваль кхандуны - Нэ мри цоха лоли мэ лав Тэ прэ площадь прастав тэ кхэлав!
(по мотивам стихов Лорки)
На ров На ров - на трэби - нашты. Сувнакуны ангрусты Чюрдэ дрэ чяр паш о дром Тэ забистэр. Битыро Ёв на шутёла - вашсо Тэ чингирэс пэскэ? Сов Ту биясвангири, ха Бикиркипнэскри, якха На чив аври, тэ раты На мэр - на трэби - нашты.
Гилы мангэла Про бьяв прэ улица багана джюкля,
баваль чямодэл ромня сыр пхэня,
синё брышын чидя мирикля,
марэнпэ пала кхам чирикля,
дро болыбэн издрана ясва,
рандэн болыбэн ветки- васта,
рат забистрэла йивэнд, йива -
гилы мангэла нэвэ лава!
Штар чяя
Штар гожа чяя кхэлэн Упрал меро кхэр, Багана, сыр чириклэ, А чён лэн дыкхэл.
Парнэ роспхурдэнпэ бая, Тырдэнпэ гиля. Кхэлэна штар гожа чяя — Тэрнэ балваля.
Пэрво балвал — хачькирды, Шуки и калы, Лакири мэн пхутькирды, Якх ратвалы.
Дуйто балвал — шылалы, Учи и парны, Санинько сыр момолы, Дыкхэл сыр раны.
Трито балвал — чоханы, Якха сыр яга, Дико и наракхуны, Хачён сыр багал.
Штарто — нанэ чибалы, Васта сыр пхака, Лакири глос насвалы, Лилейно чекат.
Штар гожа чяя кхэлэн Упрал меро кхэр, Багана, сыр чириклэ, А чён лэн дыкхэл.
Парнэ роспхурдэнпэ бая, Тырдэнпэ гиля. Кхэлэна штар гожа чяя — Тэрнэ балваля.
Нат! Коли ракирэн "сан шукарны", мэ отпхэнав "нат!, сом бутыр шукарны", и мэ пхэнав чячипэ.
Коли ракирэн "сан пхутькирды", савапэ мэ "нат!, сом бутыр пхутькирды", и на сы хохаибэ.
Коли ракирэн "сан годьвари", мэ споринав "нат!, сом бутыр годьвари", и мандэ нанэ тангипэ.
Коли ракирэн "нэ - ту мэрэс", дыкхав дро якха "да, мэ мэрав екх дывэс, бутыр - мэ сом мэрибэ".
*** Шунэс ту? - багала мро рув Дро вэш, кай чивэл чён о руп. Рувэскрэ гилятыр бавал Ровэла - башэна ясва. Дыкхэс ту? - парны длэнго чюр Э рат ростходя упрал дур, Про лакрэ воздушна бая Хачён мирикля-ягорья; Лынай сыго джял уклисто... Совэс ту? - совэс ту... мишто...
Гилы палэ дай ратуны Явья тэлэ дай ратуны, Э цоха духмяно парны. Тыкно чяворо ла дыкхэл, Дыкхэл, тэ пхурдэл забистрэл.
Издрала бавал, чёханы Вастэнца кхэлэл ратуны, Чючя мулави сыкавэл. Дыкхэл чяворо ла, дыкхэл.
— Ай, биби, уджя, уджя! Коли явэна рома, Йилэстыр тутыр ёнэ Кэрэн ангрустя парнэ!
— Чяворо, бэш, пхэнав, Дыкх, адай мэ кхэлав! Сыр явэна рома, Ту закэрэса якха.
— Ай, биби, уджя, уджя! Шунав, прастана грая! — Чяворо, бэш, пхэнав, Мро парныпэ на чилав!
О ром традэлас э грас. Мардэ марэлас э хась. Дрэ фаурни чяворо Чюдя про састыр о шэро.
Бизвучна, сыр дро сунэ, Вэшэстыр рома выгынэ, Ромэнгрэ шэрэ пхутькирдэ, Лэнгрэ якха прикэрдэ.
Сыр э сова багал, Ай, сыр про кашт ёй багал! Э дай ратуны урнял, Упрэ чяворэс лыджял.
Дрэ фаурни обровэн Рома, годля барэ дэн. Бавал са пхурдэл, пхурдэл, Бавал фаурни гаравэл.
Глындало - Глындало, глындало, роспхэн-ка чячес Ту, состыр ушта мрэ лолэ? - Са пал адава, со ратенца дыкхэс Ту сунэ греховна гудлэ. - Глындало, глындало, сукрето ракир Ту, состыр лолэ мрэ ушта? - Со лэн дандырэса, коли ту кирки Ясвин на мэкэс тэ прастал. - Глындало, глындало, откэр, на гарав Ту, состыр ушта мрэ лолэ? - Со сыр о бравинто, пхэн, чякиро рат Ту пьес, соб э дукх тэ улэс. - Глындало, глындало, коли ж роспхэнэс Ту, состыр лолэ мрэ ушта? - Помада макхян, соб тэ на сыкавэс Ту, состыр лолэ трэ ушта.
Дэ годы
Янушу Панченко Дэ годы пала мандэ, коли Ту дыкхэс прэ улица лоли Индарака, коли ту шунэс Сыр э дай совлярэл чяворэс Лакрэ — дэ пала мандэ годы, Пэскэ пхэн, со мэ сомас джиды.
|